LADC hnuaia Lawngtlai Chandmary MDC biala by-election chuh tumte hian vawiin khan Returning Officer, Lawngtlai District Election Officer ni bawk Cheemala Siva Gopal Reddy, IAS hnenah hming an pe lut a. Hming pe lutte hi -  Mizo National Front (MNF) candidate C. Lalsawmzuala, Bharatiya Janata Party (BJP) candidate K. Lalawmpuia leh Zoram People's Movement (ZPM) candidate  F. Hrangtukhuma te an ni.

Lawngtlai Chandmary MDC bial hi a bialtu, Dr Lorrain Lalpekliana Chinzah chuan Mizoram State Legislative Assembly inthlanpui, 2023-ah Lawngtlai East bial aṭanga MLA-a thlan tlin a nih hnuah a chhuahsan a; bial ruak a nih tak avangin Mizoram State Election Commission chuan by-election nei turin ruahmanna a siam ta a ni.

MDC by-election chuh tuma hming pe lutte nomination paper hi naktuk, June ni 19, 2024 (Nilaini) tlai dar 3:00-ah Returning Officer hovin endikna (scrutiny) kalpui a ni ang a. June ni 21, 2024 (Zirtawpni) chawhnu dar 1:00 thleng inhnuh dawhna hun hawn a ni ang.

Ruahman lawk dan chuan June ni 27, 2024 (Ningani) zing dar 7:00 leh tlai dar 5:00 inkarah vote thlak a ni ang a. Vote tlate hi July ni 1, 2024 (Thawhṭanni)-ah chhiar a ni ang.